நீட் தேர்வு மையத்துக்குள் செல்வதற்கு முன்பாக தாலிச்செயின், மெட்டி, பூ உள்ளிட்டவற்றை கழற்றிய புதுமணப்பெண்

 

திருநெல்வேலியில் நீட் தேர்வு மையத்துக்குள் செல்வதற்கு முன்பாக தாலிச்செயின், மெட்டி, பூ உள்ளிட்டவற்றை கழற்றிய புதுமணப்பெண் முத்துலெட்சுமி. படங்கள்: மு.லெட்சுமி அருண்

திருநெல்வேலியில் தாலிச்செயின், மெட்டியை கழற்றிய பின்னரே மையத்துக்குள் செல்ல அனுமதிக்கப்பட்டார்.

நாடு முழுவதும் கடும் கட்டுப்பாடுகளுடன் நேற்று பிற்பகல் 2 மணி முதல் மாலை 5 மணிவரை நடத்தப்பட்டது. இத்தேர்வுக்காக காலை 11 மணி முதல் மாணவ, மாணவிகள் தேர்வு மையங்களுக்குள் அனுமதிக்கப்பட்டனர். மெட்டல் டிடெக்டர் மூலம் மாணவ, மாணவிகளை போலீஸார் சோதனையிட்டனர்.

தேர்வு அறைக்குள் ஹேர்பின், நகைகள், கொலுசு போன்றவற்றை அணியத் தடை செய்யப்பட்டுள்ளதால், தேர்வு மையங்களுக்குச் செல்லும் முன்னர் மாணவிகள் அவற்றை கழற்றி பெற்றோரிடம் கொடுத்துவிட்டு சென்றனர்.

இந்நிலையில், தென்காசி மாவட்டம் வாசுதேவநல்லூரைச் சேர்ந்த வாசுதேவன் என்பவரின் மனைவி முத்துலெட்சுமி (20). இவர் பாளையங்கோட்டை தூய யோவான் மேல்நிலைப்பள்ளி தேர்வு மையத்துக்கு எழுத வந்தார்.

நகைகளை கழற்ற அறிவுறுத்தல்

கடந்த 2 ஆண்டுகளாக நீட் தேர்வுக்கு பயிற்சி பெற்றுவந்த இவருக்கு, 4 மாதங்களுக்கு முன்பு திருமணம் நடைபெற்றது.

தாலிச் செயின், மெட்டி, தலையில் பூ வைத்து வந்த முத்துலெட்சுமியை, தேர்வு மையத்துக்குள் நுழையும் முன் அங்கிருந்த அலுவலர்கள் நகைகளை கழற்றும்படி அறிவுறுத்தியுள்ளனர். தாலிச் செயின் என்பதால் முத்துலெட்சுமி தயங்கியுள்ளார். ஆனால், தேர்வு விதிமுறைப்படி நகைகள் அணிய அனுமதியில்லை என்று அலுவலர்கள் தெரிவித்துள்ளனர்.

உடன் வந்த அவரது கணவர் சம்மதம் தெரிவித்ததும், தாலிச்செயின், மெட்டி ஆகியவற்றை கழற்றி கணவரிடம் முத்துலெட்சுமி கொடுத்தார். தலையில் வைத்திருந்த பூவையும் எடுத்த பின்னரே தேர்வு மையத்துக்குள் அனுமதிக்கப்பட்டு அவர் தேர்வு எழுதினார்.

விரைவில் - ஒவ்வொரு கிராமும் ஆன்லைன் சந்தைகளுடன் இணைக்கப்படும் என பிரதமர் மோடி தெரிவித்தார்.

 

விரைவில் ஒவ்வொரு கிராமும் ஆன்லைன் சந்தைகளுடன் இணைக்கப்படும் என பிரதமர் மோடி தெரிவித்தார்.

சாலையோர வியாபாரிகளுக்கு கடன் வழங்கும் திட்டமான ‘ஸ்வானிதி’ திட்ட பயனாளர்களிடம், பிரதமர் மோடி ‘வீடியோ கான்பரன்சிங்’ மூலம் உரையாற்றினார். இதில் ம.பி., மாநிலம் இந்தூர், குவாலியர் மற்றும் சாஞ்சி பகுதிகளை சேர்ந்த வியாபாரிகள் கலந்து கொண்டனர். ம.பி., முதல்வர் சிவராஜ் சிங் சவுகானும் கலந்து கொண்டார்.

நிகழ்ச்சியில் பிரதமர் மோடி பேசியதாவது: ஏழை, அடித்தட்டு மக்களை கொரோனா அதிகம் பாதித்துள்ளது. அவர்களுக்கு உதவ அரசு பல்வேறு முயற்சிகளை எடுத்துள்ளது. ஸ்வானிதி திட்டத்தில், ஆரம்ப கடன் தொகை ரூ.10 ஆயிரம், உஜ்வாலா திட்ட பலன்கள், ஆயுஷ்மான் பாரத் காப்பீடு ஆகியவற்றை பெறலாம்.

சாலையோர விற்பனையாளர்கள் தங்கள் வியாபாரத்தை மேம்படுத்த ரூ.10 ஆயிரம் கடன் பெற்று, அதனை குறித்த காலத்தில் செலுத்தினால், படிப்படியாக கடன் தொகை அதிகரிக்கப்படும். இத்திட்டத்தில் இணைந்து பயன் பெற எந்த சேவை மையத்தையும் வியாபாரிகள் அணுகலாம்.

ஸ்வானிதி திட்டத்தில், 4.5 லட்சம் நடைபாதை வியாபாரிகள் பதிவு செய்துள்ளனர். இவர்களில் 1.4 லட்சம் விண்ணப்பங்கள் ஏற்றுக் கொள்ளப்பட்டுள்ளது. அவர்களுக்கு 140 கோடி ரூபாய் வழங்கப்பட்டுள்ளது. ஆயிரம் நாட்களுக்குள் அனைத்து கிராமங்களுக்கும், ஆப்டிகல் பைபர் இணைப்பு வழங்கப்படும். விரைவில் ஒவ்வொரு கிராமமும் ஆன்லைன் சந்தைகளுடன் இணைக்கப்படும். இவ்வாறு அவர் பேசினார்.

காரைக்குடியில் இருந்து சென்னை புறப்பட்ட பல்லவன் சிறப்பு ரயில்.

காரைக்குடியில் இருந்து சென்னை புறப்பட்ட பல்லவன் சிறப்பு ரயில்.

ஐந்து மாதங்களுக்குப் பிறகு காரைக்குடியில் இருந்து சென்னைக்கு பல்லவன் சிறப்பு ரயில் இயக்கப்பட்டதால் பயணிகள் மகிழ்ச்சி அடைந்தனர்.

கரோனா தொற்றை தடுக்க பிறப்பிக்கப்பட்ட ஊரடங்கால் 5 மாதங்களாக ரயில்கள் இயக்கப்படவில்லை.

இந்நிலையில் இன்று முதல் கூடுதல் சிறப்பு ரயில்கள் இயக்கப்படும் என ரயில்வே நிர்வாகம் அறிவித்துள்ளது. இதில் செப்.7-ம் தேதியில் இருந்து காரைக்குடியில் இருந்து சென்னை செல்லும் பல்லவன் அதிவிரைவு ரயில் சிறப்பு ரயிலாக இயக்கப்படுகிறது.

இந்த ரயில் ஏற்கனவே அதிகாலை 5.05 மணிக்கு காரைக்குடியில் இருந்து புறப்பட்டது. தற்போது அதிகாலை 4.55 மணிக்கு காரைக்குடியில் இருந்து ரயில் புறப்படுகிறது.

அதேபோல் மறுமார்க்கத்தில் சென்னை எழும்பூரில் இருந்து மாலை 3.45 மணிக்கு புறப்படுகிறது. ஐந்து மாதங்களுக்கு பிறகு இயக்கப்பட்டதால் பயணிகள் மகிழ்சசி அடைந்தனர்.

அதேபோல் ஏற்கெனவே ஒருநாள் இடைவெளியில் இயக்கப்பட்டு வந்த சென்னையில் இருந்து செங்காட்டை செல்லும் சிலம்பு ரயில், தற்போது தொடர்ந்து மூன்று நாட்கள் இயக்கப்பட உள்ளது.

செப்.10-ம் தேதி முதல் வியாழன், வெள்ளி மற்றும் சனிக்கிழமை இரவு 8.25 மணிக்கு சென்னையில் இருந்து புறப்பட்டு மறுநாள் அதிகாலை 3.30 மணிக்கு காரைக்குடியை வந்தடையும். காலை 9 மணிக்கு செங்கோட்டையை அடையும்.

அதேபோல் செப்.12-ம் தேதி முதல் சனி, ஞாயிறு, திங்கட்கிழமை மாலை 4.45 மணிக்கு செங்கோட்டையில் இருந்து புறப்படும் ரயில், இரவு 9.30 மணிக்கு காரைக்குடியை வந்தடையும். மறுநாள் அதிகாலை 5.30 மணிக்கு சென்னை எழும்பூரை அடையும்

ஸ்ரீவில்லிபுத்தூர் சதுரகிரி ஓடைகள், பாறைகளில் திடீர் வெள்ளப்பெருக்கு

 

ஸ்ரீவில்லிபுத்தூர் மேற்குத் தொடர்ச்சி மலைப்பகுதியில் சனிக்கிழமை இரவு பெய்த கனமழையின் காரணமாக சதுரகிரி ஓடைகள், பாறைகளில் திடீர் வெள்ளப்பெருக்கு ஏற்பட்டது.

 

தமிழகத்தின் வானிலை நிலவரம் குறித்து சென்னை வானிலை ஆய்வு மையம் வெளியிட்ட அறிவிப்பில் வளிமண்டல மேலடுக்கு சுழற்சி மற்றும்  வெப்பச் சலனம் காரணமாக  விருதுநகர் உட்பட பல்வேறு மாவட்டங்களில்  மழை பெய்ய வாய்ப்பு இருப்பதாகவும், மேற்குத் தொடர்ச்சி மலைப்பகுதிகளில் மழை பெய்யும் எனவும் தெரிவித்திருந்தது.

 

இந்நிலையில், சனிக்கிழமை இரவு மேற்குத் தொடர்ச்சி மலைப்பகுதியில் சுமார் 4 மணி நேரம் பெய்த கனமழையின் காரணமாக சதுரகிரி சுந்தரமகாலிங்கம் கோயிலுக்குச் செல்லும் மாங்கனி ஓடை, சங்கிலிப் பாறை, வழக்குப் பாறை உள்ளிட்ட ஓடைகளில் நீர் வரத்து அதிகரித்து வெள்ளப்பெருக்கு ஏற்பட்டுள்ளது. அமாவாசை மற்றும் பௌர்ணமியைத் தவிர பக்தர்கள் கோயிலுக்குச் செல்ல அனுமதி இல்லாததால் அதிகாரிகள் நிம்மதி அடைந்துள்ளனர்.

தமிழகத்தில் 13 சிறப்பு ரெயில்களுக்கான முன்பதிவு இன்று காலை தொடங்கியது.

தமிழகத்தில் 13 சிறப்பு ரெயில்களுக்கான முன்பதிவு இன்று காலை தொடங்கியது.

சென்னை:

தமிழகத்தில் மாவட்டங்களுக்கு இடையேயான பொது போக்குவரத்துக்கு வரும் 7-ந்தேதி முதல் தமிழக அரசு அனுமதி அளித்துள்ளது. இதையடுத்து தமிழகத்தில் 7-ந்தேதி முதல் சிறப்பு ரெயில்களை இயக்க தெற்கு ரெயில்வே முடிவு செய்துள்ளது. அதன்படி நேற்று முன்தினம் சென்னையில் இருந்து, கோவை, மதுரை, தூத்துக்குடி, திருச்சி, காரைக்குடி மற்றும் கோவையில் இருந்து மயிலாடுதுறைக்கும் 9 சிறப்பு ரெயில்களை அறிவித்தது.

 நேற்று,  தெற்கு ரெயில்வே மேலும் கூடுதலாக 4 சிறப்பு ரெயில்களை அறிவித்துள்ளது. இதுகுறித்து தெற்கு ரெயில்வே வெளியிட்டுள்ள செய்திக்குறிப்பில் கூறப்பட்டிருப்பதாவது:-

* சென்னை எழும்பூர்- செங்கோட்டை (வண்டி எண்: 06181) இடையே இயக்கப்படும் வாராந்திர சிறப்பு ரெயில் வருகிற 10-ந்தேதி முதல் வியாழன், வெள்ளி, சனிக்கிழமைகளில் இரவு 8.25 மணிக்கு எழும்பூர் ரெயில் நிலையத்தில் புறப்பட்டு, மறுநாள் காலை 9 மணிக்கு செங்கோட்டை சென்றடையும்.

இதேபோல் மறுமார்க்கமாக செங்கோட்டை- எழும்பூர் (06182) இடையே இயக்கப்படும் வாராந்திர சிறப்பு ரெயில் வருகிற 11-ந்தேதி முதல் வெள்ளி, சனி, ஞாயிற்றுக் கிழமைகளில் மாலை 4.45 மணிக்கு செங்கோட்டை ரெயில் நிலையத்தில் புறப்பட்டு, மறுநாள் அதிகாலை 5.30 மணிக்கு எழும்பூர் வந்தடையும்.

* எழும்பூர்- கன்னியாகுமரி (02633) இடையே இயக்கப்படும் சிறப்பு ரெயில் வருகிற 8-ந்தேதி முதல் மாலை 5.15 மணிக்கு எழும்பூர் ரெயில் நிலையத்தில் புறப்பட்டு மறுநாள் நாள் காலை 6.20 மணிக்கு கன்னியாகுமரி சென்றடையும்.

இதேபோல் மறுமார்க்கமாக கன்னியாகுமரி-எழும்பூர் (02634) இடையே இயக்கப்படும் சிறப்பு ரெயில் வருகிற 9-ந்தேதி முதல் மாலை 5.05 மணிக்கு கன்னியாகுமரி ரெயில் நிலையத்தில் இருந்து புறப்பட்டு மறுநாள் காலை 6.15 மணிக்கு எழும்பூர் வந்தடையும்.

* சென்னை எம்.ஜி.ஆர். சென்டிரல்-மேட்டுப்பாளையம் (02671) இடையே இயக்கப்படும் சிறப்பு ரெயில் வருகிற 7-ந்தேதி முதல் இரவு 9.05 மணிக்கு சென்டிரல் ரெயில் நிலையத்தில் புறப்பட்டு மறுநாள் காலை 6.15 மணிக்கு மேட்டுப்பாளையம் சென்றடையும்.

இதேபோல் மறுமார்க்கமாக மேட்டுப்பாளையம்-சென்னை எம்.ஜி.ஆர். சென்டிரல் (02672) இடையே இயக்கப்படும் சிறப்பு ரெயில் வருகிற 8-ந்தேதி முதல் மேட்டுப்பாளையம் ரெயில் நிலையத்தில் இருந்து இரவு 7.45 மணிக்கு புறப்பட்டு மறுநாள் அதிகாலை 4.50 மணிக்கு சென்னை வந்தடையும்.

* திருச்சி-நாகர்கோவில் (02627) இடையே இயக்கப்படும் சிறப்பு ரெயில் வருகிற 7-ந்தேதி முதல் காலை 6 மணிக்கு திருச்சி ரெயில் நிலையத்தில் இருந்து புறப்பட்டு மதியம் 1 மணிக்கு நாகர்கோவில் சென்றடையும்.

மறுமார்க்கமாக நாகர்கோவில்-திருச்சி (02628) இடையே அன்று மதியம் 3 மணிக்கு நாகர்கோவில் ரெயில் நிலையத்தில் இருந்து புறப்பட்டு இரவு 9.45 மணிக்கு திருச்சிக்கு சென்றடையும்.இவ்வாறு அதில் கூறப்பட்டுள்ளது.

இந்த 13 சிறப்பு ரெயில்களுக்கான முன்பதிவு காலை 8 மணிக்கு தொடங்கியது. கொரோனா முன்னெச்சரிக்கை விதிகளை பின்பற்றி  ரெயில் சேவை இயக்கப்பட உள்ளது.

5 மாதங்களுக்கு பிறகு ரெயில் செல்லவிருப்பதால் மக்கள் ஆர்வத்துடன் முன்பதிவு செய்து வருகின்றனர்.

சென்னை எழும்பூர் ரெயில் நிலையம் உள்ளிட்ட இடங்களில் பயணிகள் தனிமனித இடைவெளியுடன் டிக்கெட்டு பெற ஏற்பாடு செய்யப்பட்டுள்ளது.

தேர்வில் தோல்வி அடைந்த 10, 12-ம் வகுப்பு மாணவர்களுக்கு மறுதேர்வு 22ந்தேதி தொடங்க உள்ளதாக சி.பி.எஸ்.இ. அறிவித்துள்ளது.

 சிபிஎஸ்இ

     தேர்வில் தோல்வி அடைந்த 10, 12-ம் வகுப்பு மாணவர்களுக்கு மறுதேர்வு 22ந்தேதி தொடங்க உள்ளதாக சி.பி.எஸ்.இ. அறிவித்துள்ளது.

சென்னை:

சி.பி.எஸ்.இ. 10 மற்றும் 12-ம் வகுப்புக்கான பொதுத் தேர்வு நடைபெற்று முடிந்தது. இந்த நிலையில் தேர்வில் தோல்வி அடைந்த மாணவர்களுக்கு மறுதேர்வு தொடர்பான அறிவிப்பை மத்திய இடைநிலை கல்வி வாரியம் (சி.பி.எஸ்.இ.) அறிவித்து இருக்கிறது.

அதன்படி, 10-ம் வகுப்புக்கு மறுதேர்வு வருகிற 22-ந்தேதி தொடங்கி, 28-ந்தேதியுடன் நிறைவு பெறுகிறது. அதேபோல், 12-ம் வகுப்புக்கான மறுதேர்வு 22-ந்தேதி ஆரம்பித்து, 30-ந் தேதியுடன் முடிவடைகிறது.

இந்த 2 தேர்வுகளும் ஒவ்வொரு நாளும் காலை 10.30 மணிக்கு தொடங்கி பிற்பகல் 1.30 மணி வரை நடைபெற இருக்கிறது.

மாற்றுத் திறனாளி உறவினரை கவனித்துவரும் அரசு ஊழியர்களுக்கு இடமாற்றத்தில் இருந்து நிபந்தனையுடன் விலக்களிக்க உத்தரவு

 

மாற்றுத் திறனாளி உறவினரைகவனித்துவரும் அரசு ஊழியர்களுக்கு இடமாற்றத்தில் இருந்து நிபந்தனையுடன் விலக்களிக்கும் வகையில் தமிழகஅரசு உத்தரவு பிறப்பித்துள்ளது.

தமிழக அரசு ஊழியர்களைப் பொறுத்தவரை ஒரு பணியிடத்தில் 3 ஆண்டுகள் தொடர்ந்து பணியாற்றினால், இடமாற்றம் செய்யும் நடைமுறை இருந்து வருகிறது. அரசுப் பணியில் ஏ, பி, சி பிரிவில் இந்த நடைமுறை பின்பற்றப்பட்டு வருகிறது.

இந்நிலையில், தற்போது உறவினரைகவனித்துவரும் அரசுப் பணியாளர்களுக்கு இடமாற்றத்தில் இருந்து நிபந்தனையுடன் கூடிய விலக்களித்து தமிழக அரசு உத்தரவிட்டுள்ளது.

இதுறித்து தமிழக பணியாளர் மற்றும் நிர்வாக சீர்திருத்தத் துறைச் செயலர் ஸ்வர்ணா வெளியிட்ட அரசாணை:

மனநலம் பாதிக்கப்பட்ட அல்லது குழந்தைகளை உடைய அரசு ஊழியர்கள், ஒரே இடத்தில் 3 ஆண்டுகள்பணியாற்றினால், அந்த ஆண்டுமுடிவதற்கு முன் இடமாற்றத்தைநிறுத்தி வைக்க அரசிடம் கோரிக்கை வைத்தால் 5 ஆண்டுவரை இடமாற்றம் நிறுத்தி வைக்கப்படுகிறது.

விலக்கு அளிக்கலாம்

இந்நிலையில், கடந்த 2018-ம்ஆண்டு அக்டோபர் மாதம் மத்தியஅரசு அனுப்பிய கடிதத்தில், மாற்றுத் திறனாளிகள் சட்டப்படி,குறைபாடுகளை கொண்ட மகன், மகள், பெற்றோர், வாழ்க்கைத் துணை, சகோதரர் அல்லது சகோதரி என இவர்களில் ஒருவரை கவனித்துவரும் பட்சத்தில், அந்த அரசு ஊழியரை நிர்வாக வசதிக்காக இடமாற்றம் அல்லது சுழற்சி இடமாற்றம் செய்வதில் இருந்துவிலக்கு அளிக்கலாம் என கூறப்பட்டிருந்தது.

சான்றிதழ் சமர்ப்பிக்க வேண்டும்

இதை ஏற்று, வழக்கமாக ஆண்டுதோறும் ஏப்ரல் 1 முதல் மே 31-ம் தேதிக்குள் இடமாற்ற உத்தரவு பிறப்பிக்கப்படும் நிலையில், உறவினரை கவனித்து வரும் அரசுஊழியர்களுக்கு இடமாற்றத்தில் இருந்து நிபந்தனையுடன்விலக்களிக்கப்படுகிறது. அதேநேரம் அந்த அரசு ஊழியரால்கவனிக்கப்படுபவர், மாற்றுத் திறனாளிகள் சட்டத்தின்கீழ் கொடுக்கப்பட்டுள்ள குறைபாடுகளைக் கொண்டவர் என்பதற்கு சான்றிதழ் சமர்ப்பிக்கப்பட வேண்டும். இவ்வாறு அதில் கூறப்பட்டுள்ளது.

சத்துணவில் முட்டை வழங்க அனுமதி

 

சத்துணவில் முட்டை வழங்க அனுமதி அளித்து அரசாணை வெளியிடப்பட்டுள் ளது.

    தமிழகத்தில் 1 முதல் 10-ம் வகுப்பு வரை படித்து வந்த 49 லட்சத்து 85 ஆயிரத்து 335 மாணவ,மாணவிகளுக்கு சத்துணவு வழங்கப்பட்டு வந்தது. இந்நிலையில், கரோனா ஊரடங்கால் அனைத்து பள்ளிகளும் மூடப்பட்டதால் மாணவர்களுக்கு சத்துணவு வழங்கப்படவில்லை. இதற்கிடையே, பள்ளிகள் திறக்கும் வரை 1 முதல்8-ம் வகுப்பு வரையுள்ள மாணவ, மாணவிகளுக்கு அரசி, பருப்பு ஆகிய உலர் உணவு பொருட்கள் வழங்கப்பட்டு வருகின்றன.

சத்துணவு திட்டத்தின்கீழ் வழங்க தமிழகஅரசுக்கு சென்னை உயர் நீதிமன்றம் சமீபத்தில் உத்தரவிட்டது. இதைத் தொடர்ந்து, சத்துணவில் மாணவ, மாணவிகளுக்கு முட்டைவழங்க அனுமதி அளித்து அரசாணை வெளியிடப்பட்டுள்ளது.

இதுதொடர்பாக, தமிழக அரசு வெளியிட்ட அரசாணையில், ’’தொடக்கப்பள்ளி, உயர் தொடக்கப் பள்ளி மாணவர்களுக்கு ஏற்கெனவே வழங்கப்படும் உலர் உணவு பொருட்களுடன் செப்டம்பர் முதல் பள்ளிகள் திறக்கப்படும் வரை மாதம் ஒன்றுக்கு ஒரு மாணவருக்கு 10 முட்டை வழங்க அனுமதிவழங்கப்படுகிறது. பள்ளிக் கல்வித்துறையினால் கல்வி உபகரணங்கள் வழங்கப்படும்போதே உலர்உணவு பொருட்கள் மற்றும் முட்டைகளையும் வழங்க வேண்டும்’’ என்று கூறப்பட்டுள்ளது.

அக்டோபர் மாதம் கரோனா தொற்று உச்சத்துக்கு செல்லும் - தலைமைச் செயலர் கே.சண்முகம் அறிவுறுத்தல்

 

அக்டோபர் மாதத்தில் என்பதால் தடுப்பு நடவடிக்கைகளில் கூடுதல் கவனம் செலுத்த வேண்டும் என்று மாவட்ட ஆட்சியர்களுக்கு தலைமைச் செயலர் கே.சண்முகம் அறிவுறுத்தல் வழங்கியுள்ளார்.

தமிழகத்தில் 8-ம் கட்டமாக செப்.30 வரை சில தளர்வுகளுடன் ஊரடங்கு நீட்டிக்கப்பட்டுள்ளது. இந்நிலையில் மாவட்ட ஆட்சியர்களுடன் தலைமைச் செயலர் கே.சண்முகம் நேற்று ஆலோசனை நடத்தினார். தொடர்ந்து மாவட்ட ஆட்சியர்களுக்கு அவர் எழுதிய கடிதத்தில் கூறியிருப்பதாவது:

கரோனாவை கட்டுப்படுத்துவதில் நாம் அபாயகரமான கட்டத்தில் உள்ளோம். செப்.1-ம் தேதி முதல் தளர்வுகள் அறிவிக்கப்பட்ட நிலையில், கரோனா தொற்றின் மிகவும் மோசமான நிலை இனிமேல்தான் வர உள்ளது.

தொழிற்சாலைகள், வணிக நிறுவனங்கள், பொது போக்குவரத்து, வழிபாட்டுத் தலங்கள் திறக்கப்பட்டுள்ள நிலையில், அக்டோபர் மாதம் கரோனா தொற்று உச்சத்துக்கு செல்லும். பொதுமக்கள் முகக் கவசம் அணிதல், சமூக இடைவெளியைப் பின்பற்றுதல், சுய சுத்தம் இவற்றில் கவனம் செலுத்துவதை தொடர்ந்து அறிவுறுத்த வேண்டும்.

அறிகுறி தென்பட்டால் உடனடியாக பரிசோதனை செய்ய அறிவுறுத்த வேண்டும். பொதுமக்கள் அதிக அளவில் கூடும் பொது இடங்கள், பணிபுரியும் இடங்கள், ஹோட்டல்கள், பேருந்து நிலையங்களில் சமூக இடைவெளி பின்பற்றப்படுவதுடன், அடிக்கடி அந்த இடங்கள் சுத்தப்படுத்தப்பட வேண்டும்.

நோய் கட்டுப்பாட்டுப் பகுதி மேலாண்மையில் கூடுதல் கவனம்செலுத்த வேண்டும். அரசே பரிசோதித்து, தனிமைப்படுத்தி, சிகிச்சைஅளிக்கும் நிலையை மாற்றி மக்களே வந்து பரிசோதனை செய்து, தனிமைப்படுத்தி, சிகிச்சை பெறும் நிலையை உருவாக்க வேண்டும். தேவைப்பட்டால் கிராமப்புற, நகரப்புறங்களில் அதிக அளவில் கரோனா பரிசோதனைக்கான மாதிரி சேகரிப்பு மையங்களை உருவாக்க வேண்டும்.

பாதிக்கப்பட்ட பகுதியில் அதிகபரிசோதனை செய்வது, காய்ச்சல்முகாம்களை அதிக அளவில் நடத்துவது மூலம் பாதிக்கப்பட்டவர்கள் எண்ணிக்கை குறைக்க முடியும்.

இவ்வாறு பல அறிவுறுத்தல்களை வழங்கியுள்ளார்.

பட்டுக்கோட்டை-ல் ஒரு தனியார் மருத்துவமனையில் கொரோனா-ல் உயிரிழந்ததவர் உள்ளுறுப்புகள் களவாடப்பட்டுள்ளதாகவும் கோரிக்கை மனு

 தஞ்சாவூர் மாவட்டம், பட்டுக்கோட்டை நேருநகர் பள்ளிவாசல் தெருவை சேர்ந்தவர் நகைக்கடை அதிபர் சலீம் (42). கடந்த ஜுலை மாதம் 23ம் தேதி அவருக்கு மூச்சுத் திணறல் ஏற்பட்டு தஞ்சையில் உள்ள ஒரு தனியார் மருத்துவமனையில் சேர்க்கப்பட்டார். கொரோனா தொற்று பாதிப்பு உள்ளதாகக் கூறிய மருத்துவர்கள் அவருக்கு சிகிச்சை அளித்துள்ளனர். ஆனால் அவர் சிகிச்சை பலனின்றி கடந்த ஜூலைம் 29ம் தேதி காலையில் உயிரிழந்ததாக தனியார் மருத்துவமனை நிர்வாகம் அறிவித்தது. பின்னர் அவரது உடல் பட்டுக்கோட்டையில் அடக்கம் செய்யப்பட்ட நிலையில், சலீம் மனைவி சர்மிளா மற்றும் அவரது குடும்பத்தினர் சலீம் மரணத்தில் மர்மம் இருப்பதாக மாவட்ட ஆட்சித் தலைவர், மாவட்ட காவல்துறை கண்காணிப்பாளர், சார் ஆட்சியர் ஆகியோரிடம் கோரிக்கை மனு அளித்துள்ளனர் மேலும் அவரது உடல், உள்ளுறுப்புகள் களவாடப்பட்டுள்ளதாகவும் புதைக்கப்பட்ட அவரது உடலை தோண்டி எடுத்து அரசு மருத்துவர்கள் முன்னிலையில் பிரேத பரிசோதனை ஆய்வு செய்ய வேண்டுமெனவும் அந்தக் குடும்பத்தினர் கோரிக்கைகளை முன்வைத்துள்ளனர்.

இந்த நிலையில், உயிரிழந்த சலீமின் மனைவி சர்மிளா, மைத்துனர் சௌகத் ஆகியோரிடம் பட்டுக்கோட்டை அரசு மருத்துமனையில் மருத்துவத்துறை இணை இயக்குனர் டாக்டர் ராமு நேரில் விசாரணை நடத்தினார். அதேபோல் தனசேகரன் என்பவர் ஜுலை 17ஆம் தேதி இதே மருத்துவமனையில் கொரோனா தொற்றால் இறந்ததாக நிர்வாகம் அறிவித்தது. அவருடைய சாவிலும் மர்மம் இருப்பதாகக் கூறி அதிகாரிகளிடம் கோரிக்கை மனு அளிக்கப்பட்டுள்ளது.

தற்போது சம்பந்தப்பட்ட தனியார் மருத்துவமனை நிர்வாகத்தினிடமும் விசாரணை நடத்தப்பட்டதாக அரசு மருத்துவமனை வட்டாரங்கள் தெரிவித்தன.

 

வேலூர்-ல் மாணவர்களுக்கு குடற்புழு நீக்க மாத்திரைகளை வினியோகம் செய்ய முடிவு.

 

வேலூர்-ல்  ஒன்று முதல் 19 வயது வரை உள்ள மாணவர்களுக்கு குடற்புழு நீக்க மாத்திரைகளை 3 கட்டங்களாக வினியோகம் செய்ய முடிவு செய்யப்பட்டுள்ளது.

 

மத்திய அரசின் தேசிய ஊரக சுகாதாரத்துறை சார்பில் ஆண்டுதோறும் ஆகஸ்ட் மாதம் தேசிய குடற்புழு ஒழிப்பு தினம் கடைபிடிக்கப்படுகிறது. அதன்படி அங்கன்வாடி மையங்களில் 1 முதல் 5 வயது குழந்தைகளுக்கும், அரசு பள்ளிகள், நிதியுதவி, தனியார் பள்ளிகளில் படிக்கும் 6 முதல் 19 வயது உள்ள அனைவருக்கும் குடற்புழு நீக்க மாத்திரை அல்பெண்டசோல் வழங்கப்பட்டு வருகிறது. இந்நிலையில் கொரோனா ஊரடங்கு காரணமாக அங்கன்வாடி, பள்ளி, கல்லூரிகள் மூடப்பட்டதால் ஆகஸ்ட் மாதம் வழங்க வேண்டிய குடற்புழு மாத்திரை வழங்கப்படவில்லை. செப்டம்பர் மாதம் நாடு முழுவதும் வழங்கி முடிக்க மத்திய அரசு உத்தரவிட்டுள்ளது.இதற்கிடையில் தமிழகம் முழுவதும் குடற்புழு மாத்திரைகளை 3 கட்டங்களாக வழங்க சுகாதாரத்துறை மூலம் பள்ளிக்கல்வித்துறை நடவடிக்கை மேற்கொள்ளப்பட்டுள்ளது.இதுகுறித்து பள்ளிக்கல்வித்துறை மற்றும் சுகாதாரத்துறை அதிகாரிகள் கூறியதாவது:தமிழகம் முழுவதும் ஒரு வயது முதல் 19 வயது வரை உள்ளவர்களுக்கு வரும் 14ம் தேதி முதல் 28ம் தேதி வரை குடற்புழு நீக்க மாத்திரை வழங்க நடவடிக்கை மேற்கொள்ளப்பட்டுள்ளது. முதல்கட்டமாக 14ம்தேதி முதல் 19ம் தேதி வரையும், 2வது கட்டமாக 21ம் தேதி முதல் 26ம் தேதி வரையும், விடுபட்டவர்களுக்கு 28ம் தேதி வழங்கவும் முடிவு செய்யப்பட்டுள்ளது.

அங்கன்வாடி, அரசு மற்றும் நிதியுதவி, தனியார் பள்ளிகளில் படிக்கும் அனைத்து மாணவர்களுக்கும் வழங்கப்படுகிறது. மேலும் இந்த பணியில் அங்கன்வாடி பணியாளர்கள், ஆசிரியர்களும் ஈடுபட உள்ளனர். ஒவ்வொரு பகுதியில் உள்ள அங்கன்வாடி மையத்தின் அருகே அழைத்து மாத்திரை வழங்கப்படும்.இந்த மாத்திரை மூலம் குடல் புழுக்களை கட்டுப்படுத்துதல், ஊட்டச்சத்து குறைபாடுகளை சரிசெய்தல், மன அழுத்தம், இரும்புச்சத்து குறைபாடு போன்ற பல்வேறு நோய்களுக்கு ஆளாகும் குழந்தைகள் மற்றும் மாணவ, மாணவிகளுக்கு நோய்கள் வரும் முன்பே தடுப்பு நடவடிக்கை மேற்கொள்ளப்படுகிறது. இந்த மாத்திரை 400 மில்லி கிராம் கொண்டது. பள்ளிகள், வீடுகள் தோறும் நேரடியாக கிராம செவிலியர்கள் மற்றும் அங்கன்வாடி பணியாளர்கள், ஆசிரியர்கள் ஈடுகின்றனர். கொரோனா காரணமாக சமூக இடைவெளியை கடைப்பிடித்து இந்த பணி நடைபெறும். இந்த மாத்திரை சாப்பிடுவதால் எந்த பாதிப்பு ஏற்படாது. இதை கண்டிப்பாக மாணவ, மாணவிகள் உட்கொள்ள வேண்டும்.இவ்வாறு அவர்கள் கூறினர்.

தமிழக அரசு சிறப்பு ரயில்களுக்கான முன்பதிவு நாளை காலை 8 மணிக்கு தொடங்குகிறது.

 

பொது முடக்கத்தில் தளா்வு செய்யப்பட்டுள்ள நிலையில் வரும் 7-ஆம் தேதி முதல் மாநிலத்துக்குள் ரயில் சேவை தொடங்கப்படும் என தமிழக அரசு அறிவிக்கப்பட்டுள்ளதை அடுத்து . இந்த சிறப்பு ரயில்களுக்கான முன்பதிவு நாளை காலை 8 மணிக்கு தொடங்குகிறது. 

 

கரோனா பரவலைத் தடுக்க மாா்ச் 25-ஆம் தேதி முதல் அமல்படுத்தப்பட்டிருந்த பொது முடக்கத்தில் தளா்வு செய்யப்பட்டுள்ள நிலையில் வரும் 7-ஆம் தேதி முதல் தமிழகத்திலுள்ள அனைத்து மாவட்டங்களுக்கும் பேருந்துகளும், மாநிலங்களுக்குள் பயணிகள் ரயில் சேவையும் தொடங்கப்படும் என தமிழக முதல்வா் எடப்பாடி கே.பழனிசாமி அறிவித்தாா். அதன்படி, முதல்கட்டமாக தமிழகத்தில் ஏற்கெனவே அனுமதிக்கப்பட்டிருந்த 7 சிறப்பு ரயில்களை மீண்டும் இயக்க முடிவு செய்யப்பட்டுள்ளது. இதில், கோவை-காட்பாடி, மதுரை-விழுப்புரம்-செங்கல்பட்டு சிறப்பு ரயில்கள் சென்னை வரை நீட்டிக்கப்படவும் திட்டமிடப்பட்டுள்ளது. கூடுதலாக 6 சிறப்பு ரயில்கள் உள்பட மொத்தம் 13 சிறப்பு ரயில்களை இயக்க ரயில்வே வாரியம் ஒப்புதல் அளித்துள்ளது.

 

7-ஆம் தேதி முதல் ரயில் சேவை தொடங்கப்பட உள்ள நிலையில் கிருமி நாசினி கொண்டு ரயில் நிலையத்தை சுத்தம் செய்யும் பணிகளும் தீவிரமாக மேற்கொள்ளப்பட்டு வருகின்றன. மேலும், டிக்கெட் பெற வரும் பயணிகள் சமூக இடைவெளியுடன் நிற்பதற்கான ஏற்பாடுகளும் செய்யப்பட்டுள்ளன. கட்டாயமாக முகக்கவசம் அணிந்து வரும் பயணிகளுக்கு மட்டுமே டிக்கெட் வழங்கப்பட்டு வருவதாகவும் ரயில்வே அதிகாரிகள் தெரிவித்தனா்.

இந்த நிலையில் 7-ஆம் தேதி முதல் இயக்கப்பட உள்ள சிறப்பு ரயில்களுக்கான டிக்கெட் முன்பதிவு, நாளை காலை 8 மணிக்கு தொடங்குகிறது. 

 

ரயில் நிலையத்துக்கு வரும் அனைத்து பயணிகளும் பரிசோதனை செய்யப்பட்டு, அறிகுறி இல்லாதவர்கள் மட்டுமே ரயிலில் அனுமதிக்கப்படுவார்கள். பயணத்திற்கான டிக்கெட் உறுதிசெய்யப்பட்டவர்கள் மட்டுமே ரயில் நிலையத்திற்குள் அனுமதிக்கப்படுவார்கள். 90 நிமிடங்களுக்கு முன்பாகவே ரயில் நிலையத்துக்கு வந்து சேர வேண்டும். ரயிலில் போர்வை, தலையணை உள்ளிட்டவை வழங்கப்படாது. குளிர்சான பெட்டிகளில் தேவையான அளவிக்கு வெப்பநிலை ஒழுங்குப்படுத்தப்படும் என தெற்கு ரயில்வே தெரிவித்துள்ளது. 

திருவண்ணாமலை பெரம்பலூர் - பிரதமரின் விவசாய கிசான் நிதி உதவி திட்டத்தில் கீழ் கோடி கணக்கில் மோசடி செய்த அதிகாரிகள்

திருவண்ணாமலை மாவட்டத்தில்  பிரதமரின் விவசாய நிதி உதவி திட்டத்தின் கீழ் கோடி கணக்கில் பண மோசடி செய்தது அம்பலமாகியுள்ளது. கடலூர், கள்ளக்குறிச்சி, நாமக்கல் மாவட்டங்களை தொடர்ந்து, திருவண்ணாமலை, பெரம்பலூர் மாவட்டத்திலும் கிசான் நிதி உதவி திட்டத்தில் முறைகேடு நடந்திருப்பது அம்பலமாகியுள்ளது. திருவண்ணாமலை மாவட்டத்தில், திருவண்ணாமலை, துரிஞ்சாப்புறம், புதுப்பாளையம், கீழ்பென்னாத்தூர் உள்ளிட்ட 18 ஒன்றியங்களில் கிசான் திட்டத்தின் கீழ் மோசடி நடைபெற்றுள்ளது கண்டறியப்பட்டுள்ளது. மேலும் இந்த திட்டத்தில், நிலம் இல்லாத 30 ஆயிரம் பேரை முறைகேடாக சேர்த்தது தெரியவந்துள்ளது.

தொடர்ந்து, 18 கோடிக்கும் மேல் முறைகேடு நடந்திருப்பதும் அம்பலமாகிருகிறது. இந்நிலையில், போலி பயனாளிகளை சேர்த்தவர்கள் மீது உரிய நடவடிக்கை எடுக்க வேண்டும் என்பது பாதிக்கப்பட்ட விவசாயிகளின் கோரிக்கையாக உள்ளது. இதேபோல் பெரம்பலூர் மாவட்டத்தில், 60 லட்சம் ரூபாய் முறைகேடு நடந்துள்ளது அம்பலமாகியுள்ளது. மேலும் இதுதொடர்பாக விசாரணை நடத்திய மாவட்ட நிர்வாகம் தோட்டக்கலைத்துறை பணியாளர்கள் 5 பேரை பணியிடை நீக்கம் செய்துள்ளது. இதனைத்தொடர்ந்து போலி பயனாளிகளின் வங்கி கணக்குகள் முடக்கப்பட்டுள்ளதாக அதிகாரிகள் தெரிவித்துள்ளனர். இதனையடுத்து இதுபோன்று தொடர் முறைகேட்டில் ஈடுபடுபவர்கள் மீது கடும் நடவடிக்கை எடுக்கப்பட வேண்டும் என அனைத்து தரப்பினரும் அரசுக்கு வேண்டுகோள் விடுத்துள்ளனர்.

சசிகலா இந்த மாத இறுதிக்குள் (செப்டம்பர்) வெளியே வருவதற்கான வாய்ப்பு..

        சொத்துக் குவிப்பு வழக்கில் குற்றவாளியாக அறிவிக்கப்பட்டு பெங்களூரு சிறையில் அடைக்கப்பட்டுள்ள சசிகலா தண்டனை காலம் முடிவடைந்து அவர் இம்மாத இறுதியில் வெளியே வர வாய்ப்பு உள்ளதாக அவரது வழக்குரைஞர் ராஜா செந்தூர்பாண்டியன் கூறியுள்ளார். 

 

சசிகலாவுக்கு சொந்தமான ரூ. 300 கோடி மதிப்புள்ள சொத்துகளை வருவமான வரித் துறை முடக்கியுள்ளதாகத் தகவல்கள் தெரிவிக்கின்றன. பினாமி தடுப்புச் சட்டத்தின்கீழ் இந்த நடவடிக்கை மேற்கொள்ளப்பட்டுள்ளதாகக் கூறப்படுகிறது.

முன்னதாக, கடந்த 2017-இல் சசிகலாவின் உறவினர்கள், ஆதரவாளர்கள் வீடுகள், அலுவலகங்கள் என சுமார் 187 இடங்களில் வருமான வரித் துறையினர் சோதனை நடத்தினர். இந்த சோதனையின் முடிவில் சுமார் ரூ. 1,500 கோடி மதிப்புள்ள சொத்து ஆவணங்கள், ரூ. 5.5 கோடி ரொக்கம், 15 கிலோ தங்கம் உள்ளிட்டவை பறிமுதல் செய்யப்பட்டதாகத் தகவல் வெளியானது. இதையடுத்து, விசாரணையின் முடிவில் சசிகலா பினாமிகளின் ரூ. 1,500 கோடி மதிப்புள்ள சொத்துகளை வருமான வரித் துறை முடக்கியது. 

 

சென்னை போயஸ் கார்டனில் மறைந்த முதவர் ஜெயலலிதா இல்லத்துக்கு எதிரே 8 கிரவுண்டு இடத்தை சசிகலா பினாமி பெயரில் வாங்கி இருப்பதாக கூறி, கட்டுமான பணிகள் நடைபெற்று வரும் அந்த இடத்தில்  ‘பினாமி தடுப்பு சட்டத்தின் கீழ் முடக்கப்பட்டுள்ளது’  என்று வருமான வரித்துறை சில தினங்களுக்கு முன்பு நோட்டீஸ் ஒட்டியது. இதுதொடர்பாக சிறையில் இருக்கும் சசிகலா மற்றும் சொத்துகளை பதிவு செய்த சார்பதிவாளர் உள்ளிட்டோருக்கும் விளக்கம் கேட்டு நோட்டீஸ் அனுப்பி உள்ளது. 

 

இந்நிலையில், சொத்துக் குவிப்பு வழக்கில் குற்றவாளியாக அறிவிக்கப்பட்டு பெங்களூரு சிறையில் அடைக்கப்பட்டுள்ள சசிகலா தண்டனை காலம் முடிவடைந்து அவர் இம்மாத இறுதியில் வெளியே வர வாய்ப்பு உள்ளதாக அவரது வழக்குரைஞர் ராஜா செந்தூர்பாண்டியன் தெரிவித்தார். 

 

இதுதொடர்பாக அவர் கூறியதாவது: கர்நாடக சிறை விதிகளின் அடிப்படையில் சிறை கைதிகள் நன்னடத்தையின்படி ஒவ்வொரு மாதமும் 3 நாள்கள் தண்டனை குறைப்பு சலுகையை பெற முடியும். ஊழல் தடுப்பு சட்டத்தில் கைது செய்யப்பட்டவர்களுக்கு இந்த சலுகை கிடையாது என்று கர்நாடக சிறை விதியில் எங்கும் குறிப்பிடப்படவில்லை. எனவே 43 மாத காலம் சிறை தண்டனை காலம்  முடிவடைந்து உள்ள சசிகலா, 43 மாதங்களுக்கு தலா 3 நாள்கள் வீதம் 129 நாள்கள் தண்டனை குறைப்பு சலுகை பெற தகுதி உடையவர் ஆகிறார். எனவே இந்த மாதம்(செப்டம்பர்) இறுதியில் அவர் வெளியே வருவதற்கு வாய்ப்புகள் மிக அதிகம் என்றார்.

 

மேலும் போயஸ் கார்டனில் கட்டப்பட்டு வரும் ஒரு வீட்டை சசிகலாவின் பினாமி சொத்து என்று வருமான வரித்துறையினர் எப்படி சொல்கிறார்கள்? என்று தெரியவில்லை. வருமான வரித்துறையினரின் இந்த நடவடிக்கையை நாங்கள் சட்ட ரீதியாக எதிர்கொள்வோம். நான் சசிகலாவின் வழக்குரைஞராக சொல்ல விரும்புவது அவருக்கோ அல்லது எங்களுக்கோ இதுவரை வருமான வரித்துறையின் நோட்டீஸ் நகல் கிடைக்கவில்லை. சசிகலா இந்த மாத இறுதிக்குள் (செப்டம்பர்) வெளியே வருவதற்கான வாய்ப்புகள் உள்ளன. 

 

சசிகலா கடந்த 2019-ஆம் ஆண்டு நவம்பர் மாதம் தண்டனை குறைப்பு பெற்று விடுதலை நிலையை அடைந்துவிட்டார். அதற்கான சட்டப்பணிகளை நாங்கள் மேற்கொண்டு இருக்கிறோம் என்று வழக்குரைஞர் ராஜா செந்தூர்பாண்டியன் கூறினார். 

மேட்டூர் அணை இன்று 21 ஆயிரத்து 339 கன அடியாக அதிகரித்துள்ளது.

மேட்டூர் அணைக்கு நேற்று 17 ஆயிரத்து 937 கன அடியாக இருந்த நீர்வரத்து இன்று 21 ஆயிரத்து 339 கன அடியாக அதிகரித்துள்ளது.

தமிழகத்தில் காவிரி நீர்ப்பிடிப்பு பகுதிகளான கிருஷ்ணகிரி மாவட்டம் அஞ்செட்டி, நட்ராம்பாளையம் மற்றும் அதையொட்டி உள்ள தருமபுரி மாவட்டம் கூத்தப்பாடி பகுதிகளில் கடந்த சில நாட்களாக கனமழை பெய்து வருகிறது.

இதனால் தமிழக – கர்நாடக எல்லையான பிலிகுண்டுலு காவிரி ஆற்றில் தொடர்ந்து நீர்வரத்து அதிகரித்துள்ளதால் ஒகேனக்கல் காவிரியிலும் நீர்வரத்து படிப்படியாக அதிகரித்து வருகிறது.

ஒனேக்கல்லில் நேற்று காலை 18 ஆயிரம் கன அடியாக இருந்த நீர்வரத்து மாலையில் 22 ஆயிரம் கன அடியாக அதிகரித்தது. இதனால் ஒகேனக்கல் மெயின் அருவி, ஐந்தருவி, சினிபால்ஸ் உள்பட அனைத்து அருவிகளிலும் தண்ணீர் ஆர்ப்பரித்து கொட்டுகிறது.

ஒகேனக்கல்லுக்கு வரும் தண்ணீர் நேராக மேட்டூர் அணைக்கு வருகிறது. இதனால் மேட்டூர் அணைக்கு நீர்வரத்து படிப்படியாக அதிகரித்து வருகிறது.

நேற்று 17 ஆயிரத்து 937 கன அடியாக இருந்த நீர்வரத்து இன்று 21 ஆயிரத்து 339 கன அடியாக அதிகரித்தது. அணையில் இருந்து காவிரியில் 9 ஆயிரம் கன அடி தண்ணீரும், கால்வாயில் 700கன அடி தண்ணீரும் திறந்து விடப்பட்டுள்ளது.

அணைக்கு வரும் தண்ணீரை விட அணையில் இருந்து குறைந்த அளவே நீர் திறந்து விடப்படுவதால் அணையின் நீர்மட்டம் மீண்டும் வேகமாக உயர்ந்து வருகிறது. நேற்று 89.50 அடியாக இருந்த மேட்டூர் அணை நீர்மட்டம் இன்று மேலும் சுமார் 1 அடி உயர்ந்து 90.36 அடியாக இருந்தது. இதனால் விவசாயிகள் மகிழ்ச்சி அடைந்துள்ளனர்.

திருச்செந்தூர் சுப்பிரமணிய சுவாமி கோவில் ஆன்லைனில் பதிவு செய்து அனுமதி

 

ஆன்லைனில் பதிவு செய்து அனுமதி சீட்டு பெற்றால் மட்டுமே சாமி தரிசனம் செய்யலாம் என்று திருச்செந்தூர் சுப்பிரமணிய சாமி கோவில் நிர்வாகம் அறிவித்துள்ளது.

திருச்செந்தூர் சுப்பிரமணிய சுவாமி கோவில்

ஆன்லைனில் பதிவு செய்து அனுமதி சீட்டு பெற்றால் மட்டுமே சாமி தரிசனம் செய்யலாம் என்று திருச்செந்தூர் சுப்பிரமணிய சாமி கோவில் நிர்வாகம் அறிவித்துள்ளது.

திருச்செந்தூர்: செப்டம்பர் 6-ம் தேதி முதல் ஆன்லைன் அனுமதி சீட்டு பெற்றால் மட்டுமே பக்தர்கள் சுவாமி தரிசனம் செய்ய அனுமதி வழங்கப்படும் என்று திருச்செந்தூர் சுப்பிரமணியசுவாமி திருக்கோயில் நிர்வாகம் அறிவித்துள்ளது. இந்த அனுமதி சீட்டை நாளை முதல் திருக்கோவிலின் அதிகாரப்பூர்வ இணையதள முகவரியில்(www.tnhrce.gov.in) முன்பதிவு செய்து பெற்றுக் கொள்ளலாம் என்றும் கோவில் நிர்வாகம் தெரிவித்துள்ளது. 

 

ஆன்லைன் முன் பதிவின்றி பக்தர்கள் சுவாமி தரிசனம் செய்ய அனுமதியில்லை எனவும் தரிசனத்திற்கான அனுமதி சீட்டுடன் ஆதார் அட்டை கட்டாயம் கொண்டு வர வேண்டும் எனவும் தெரிவிக்கப்பட்டுள்ளது. மேலும் திருவிழா நேரங்களில் அதனை காண பக்தர்களுக்கு அனுமதி இல்லை. பக்தர்களுக்கு கடற்கரையில் நீராடவும், நாழி கிணற்றில் தீர்த்தம் தெளித்தல் மற்றும் தங்கும் விடுதிகளில் பக்தர்கள் தங்கவும் அனுமதி இல்லை. மதிய அன்னதானம் பொட்டலங்களாக வழங்கப்படும் எனவும் கோவில் நிர்வாகம் தெரிவித்துள்ளது.

 

பப்ஜி உள்பட 118 செல்லிடப்பேசி செயலிகளுக்கு மத்திய அரசு தடை - சீனா எதிர்ப்பு

 

பப்ஜி உள்பட 118 செல்லிடப்பேசி செயலிகளுக்கு மத்திய அரசு தடை விதித்த நடவடிக்கைக்கு சீனா எதிர்ப்பு தெரிவித்தள்ளது.

சீன வர்த்தகத் துறையின் செய்தித் தொடர்பாளர் கோ ஃபெங் இது பற்றி செய்தியாளர்களிடம் பேசுகையில், சீன நிறுவனங்கள் மீது பாரபட்சமான கட்டுப்பாடுகளை விதித்து, இந்தியா அரசு தனது தேசிய பாதுகாப்பை தவறாகப் பயன்படுத்துகிறது. 

இந்திய அரசு எடுத்திருக்கும் இந்த நடவடிக்கையை மறுபரிசீலனை செய்ய வேண்டும். இந்தியா – சீனா இடையேயான பொருளாதார மற்றும் வர்த்தக ஒத்துழைப்பு, பல்வேறு நன்மைகளை ஏற்படுத்துகிறது என்றும் அவர் குறிப்பிட்டுள்ளார்.

இந்தியாவில் இளைஞா்கள் மத்தியில் பிரபலமான ‘பப்ஜி’ விளையாட்டு செயலி உள்பட சீனாவுடன் தொடா்புடைய 118 செயலிகளுக்கு மத்திய அரசு புதன்கிழமை தடை விதித்தது. தேசத்தின் பாதுகாப்பு மற்றும் இறையாண்மைக்கு ஆபத்து விளைவிக்கக் கூடியவை என்ற அடிப்படையில் இந்த நடவடிக்கை எடுக்கப்பட்டுள்ளது.

இந்த செயலிகள் சீனாவைச் சோ்ந்தவை மற்றும் சீனாவுடன் தொடா்புடையவையாகும். தடை செய்யப்பட்ட செயலிகளில் மிகவும் பிரபலமான பப்ஜி, தென்கொரியாவைச் சோ்ந்தது என்றாலும், அதன் பெரும் பகுதி வருவாய் சீனாவைச் சோ்ந்த நிறுவனத்துக்கே செல்கிறது என்பது குறிப்பிடத்தக்கது.

வன்முறைக்கு வித்திடும் பப்ஜி: பப்ஜி விளையாட்டில் பங்கேற்பவா்கள் கூட்டாகச் சோ்ந்து எதிா்த்து வருபவா்களை கொலை செய்வதன் மூலமே வெற்றி பெற முடியும் என்பதுபோல வடிவமைக்கப்பட்டுள்ளது. இது சிறாா், இளைஞா்கள் மத்தியில் வன்முறை மனப்பான்மையை ஏற்படுத்துவதாகவும், பலா் இரவு, பகலாக இந்த விளையாட்டில் மூழ்கிக் கிடப்பதாகவும் பரவலாக குற்றச்சாட்டு உள்ளது.

புகாரின் அடிப்படையில் நடவடிக்கை: 118 செயலிகளுக்கு விதிக்கப்பட்ட தடை தொடா்பாக மத்திய அரசு வெளியிட்ட செய்தியில் கூறியிருப்பதாவது:

ஆன்ட்ராய்டு, ஐஎஸ்ஓ தொழில்நுட்பத்துடன்கூடிய அறிதிறன்பேசிகளில் இடம்பெற்றிருக்கும் சில செயலிகள் மூலம் அதைப் பயன்படுத்துபவா்களின் தகவல்கள், இந்தியாவுக்கு வெளியில் உள்ள அந்தச் செயலிகளின் சா்வா்களிலிருந்து திருடப்படுவதாக மத்திய தகவல்தொழில்நுட்ப அமைச்சகத்துக்கு புகாா்கள் வந்தன.

அதனடிப்படையில், பப்ஜி, பாய்டு, பாய்டு எக்ஸ்பிரஸ், டென்சென்ட் வாச்லிஸ்ட், ஃபேஸ்யு, வீசாட் ரீடிங், டென்சென்ட் வியுன் உள்பட 118 செயலிகளுக்கு தடை விதிக்கப்பட்டுள்ளது. இந்தியாவின் இறையாண்மை, ஒருமைப்பாடு, தேசத்தின் பாதுகாப்பு, மாநிலங்களின் பாதுகாப்பு ஆகியவற்றுக்கு பாதிப்பு ஏற்படுத்தக்கூடும் என்ற அடிப்படையில் இந்த செயலிகளுக்குத் தடை விதிக்கப்பட்டுள்ளது என்று தெரிவிக்கப்பட்டுள்ளது. இந்தச் செயலிகள் அனைத்தும் ஏதாவது ஒருவகையில் சீனாவுடன் தொடா்பு உள்ளது என்பது குறிப்பிடத்தக்கது.

பின்னணி: சீனாவுடனான லடாக் எல்லைப் பகுதியில் கடந்த மூன்று மாதங்களுக்கு மேலாக பதற்றம் நிலவி வருகிறது. கடந்த சில நாள்களுக்கு முன்பு சீன ராணுவத்தின் அத்துமீறல் முயற்சியை இந்திய ராணுவம் முறியடித்தது.

இந்நிலையில், சீனா தொடா்புடைய செயலிகளுக்கு இந்தியாவில் தடை விதிக்கப்பட்டுள்ளது முக்கியத்துவம் பெற்றுள்ளது. ஏற்கெனவே சீனாவைச் சோ்ந்த 106 செயலிகளுக்கு கடந்த சில மாதங்களுக்கு முன்பு மத்திய அரசு தடை விதித்தது.

கிழக்கு லடாக்கின் கல்வான் பள்ளத்தாக்குப் பகுதியில் கடந்த ஜூன் 15-ஆம் தேதி இரவு இந்தியா-சீனா ராணுவத்தினரிடையே நிகழ்ந்த மோதலில் இந்திய ராணுவ வீரா்கள் 20 போ் உயிரிழந்தனா். சீனத் தரப்பில் 35-க்கும் அதிகமான வீரா்கள் உயிரிழந்தனா். எனினும், அதனை சீனா பகிரங்கமாக ஒப்புக் கொள்ளவில்லை.

அதையடுத்து, லடாக் எல்லைப் பகுதிகளில் இரு நாடுகளும் பாதுகாப்பை வலுப்படுத்தின. அதன் காரணமாக எல்லைப் பகுதியில் பதற்றம் நிலவியதுடன், இரு நாட்டு உறவில் இறுக்கம் ஏற்பட்டது. பதற்றத்தைத் தணிக்க தொடா்ந்து பேச்சு நடத்தப்பட்டு வருகிறது.

இந்த சூழ்நிலையில், இந்தியாவில் சீன எதிா்ப்பு மனப்போக்கு அதிகரித்தது. மேலும், சீன செயலிகள் மூலம் இந்தியா்களின் தகவல்கள் திருடப்படுவதாகவும், இந்தியா்களைப் பயன்படுத்தி சீன நிறுவனங்கள் அதிக பொருளாதார பயனடைவதாகவும், சில செயலிகளால் தேசப் பாதுகாப்புக்கு அச்சுறுத்தல் இருப்பதாகவும் குற்றச்சாட்டு எழுந்தது.

இந்த நிலையில், டிக்டாக், ஷோ் இட், யூசி பிரௌசா், கேம் ஸ்கேனா், வீசாட் உள்ளிட்ட 59 செயலிகளுக்கு தடை விதிப்பதாக மத்திய அரசு கடந்த ஜூன் 29-ஆம் தேதி அறிவித்தது. அதைத் தொடா்ந்து ஜூலை மாதத்தில் மேலும் 47 சீன செயலிகளுக்கு மத்திய அரசு தடை விதித்தது.

இதன் மூலம் சா்வதேச அளவில் மிகவும் பிரபலமான சீனாவின் டிக்-டாக், வீசாட் ஆகியவற்றுக்குத் தடை விதித்த முதல் நாடு என்ற பெயரை இந்தியா பெற்றது. இந்தியாவின் இந்த நடவடிக்கையை அமெரிக்க அதிபா் டிரம்ப் மற்றும் அந்நாட்டு எம்.பி.க்கள் பலா் வரவேற்றனா். பின்னா், அமெரிக்காவும் டிக்-டாக், வீசாட் செயலிகளை தடை செய்வதாக அறிவித்தது.

இப்போது 3-ஆவது கட்டமாக சீனாவுடன் தொடா்புடைய 118 செயலிகளுக்கு மத்திய அரசு அதிரடியாக தடை விதித்துள்ளது சா்வதேச அளவில் பரபரப்பை ஏற்படுத்தியுள்ளது. எல்லையில் சீனா நடத்தும் அத்துமீறல்களுக்கு பதிலடி தரும் வகையில் அந்நாட்டுக்கு அதிக வருவாய் ஈட்டித்தரும் இதுபோன்ற செயலிகள் மீது இந்திய அரசு நடவடிக்கை எடுப்பதாக சா்வதேச அரசியல் நோக்கா்கள் கருத்து தெரிவித்துள்ளனா்.

தமிழகத்தில் புதிதாக 5,892 பேருக்கு கரோனா தொற்று

 

சென்னை தவிர்த்து தமிழகத்தின் பிற மாவட்டங்களில் இன்று 4,924 பேருக்கு கரோனா தொற்று இருப்பது உறுதி ஆகியுள்ளது.தமிழகத்தில் இன்றைய கரோனா பாதிப்பு குறித்த விவரங்களை மாநில சுகாதாரத் துறை வெளியிட்டுள்ளது. இதன்படி, தமிழகத்தில் புதிதாக 5,892 பேருக்கு கரோனா தொற்று உறுதி ஆகியுள்ளது. இதனால் தமிழகத்தில் மொத்த பாதிப்பு 4,45,851 ஆக உயர்ந்துள்ளது. இதில், அதிகபட்சமாக சென்னையில் இன்று 968 பேருக்கு தொற்று உறுதியானது. இதனால் சென்னையில் மொத்த பாதிப்பு 1,38,724 ஆக அதிகரித்துள்ளது. சென்னை தவிர்த்து பிற மாவட்டங்களில் இன்று 4,924 பேருக்கு தொற்று இருப்பது கண்டறியப்பட்டுள்ளது. இன்றைய பாதிப்பில், சென்னைக்கு அடுத்தபடியாக, கோவை மாவட்டத்தில் 593 பேருக்கும், கடலூர் மாவட்டத்தில் 590 பேருக்கும்தொற்று உறுதி ஆகியுள்ளது.  

தமிழகத்தில் இன்று 5,892 பேருக்குக் உறுதியாகியுள்ளது. மொத்த எண்ணிக்கை 4,45,851. சென்னையில் மட்டும் 1,38,724 பேர் பாதிக்கப்பட்டுள்ளனர். பிசிஆர் பரிசோதனை 50 லட்சத்தைக் கடந்துள்ளது.

இன்று மட்டும் வெளி மாநிலத்திலிருந்து தமிழகத்துக்கு வந்தவர்களில் 37 பேருக்குத் தொற்று இருப்பது கண்டுபிடிக்கப்பட்டுள்ளது. அரசு அனுமதி அளித்தபின் அண்டை மாநிலம் மற்றும் வெளிநாடுகளிலிருந்து விமானம், ரயில், சாலை மார்க்கமாக வந்தவர்கள் இன்றைய தேதி வரை மொத்த எண்ணிக்கை 7,85,402.

சென்னையில் 968 பேர் கரோனா தொற்றால் பாதிக்கப்பட்டுள்ளனர். இன்று சென்னை உள்ளிட்ட 37 மாவட்டங்களில் தொற்று எண்ணிக்கை வந்துள்ளது. சென்னையைத் தவிர 36 மாவட்டங்களில் 4,924 பேருக்குத் தொற்று உள்ளது. இதில் சென்னையைத் தவிர வேறு சில மாவட்டங்களிலும் நான்கு இலக்கத்தில் எண்ணிக்கை அதிகரித்து வருகிறது.

வழிபாட்டு தலங்களை திறக்க அனுமதி

TN Temples

 

    இந்து சமய அறநிலையத்துறை தெரிவித்துள்ளது. ஊரடங்கில் தளர்வுகளை அறிவித்துள்ள தமிழக அரசு, வழிபாட்டு தலங்களை திறக்க அனுமதி கொடுத்துள்ளது. இரவு 8 மணி வரை பக்தர்கள் அனுமதிக்கப்படுவார்கள் என தெரிவிக்கப்பட்டுள்ளது. இந்நிலையில், கோயில்களில் பக்தர்கள் வழிபடுவதற்கான வழிகாட்டு நெறிமுறைகளை தமிழக அர வெளியிட்டுள்ளது.

அதன்படி பக்தர்கள், கோயிலுக்குள் நுழைவதற்கு முன்னர் 

 

* கை, கால்களை கழுவிய பின்னரே உள்ளே நுழைய அனுமதிக்கப்படுவார்கள்

* உடல் வெப்ப பரிசோதனைக்கு ஒத்துழைப்பு வழங்க வேண்டும்

* கோயில்களில் தனிமனித இடைவெளி கட்டாயம்

* கோயில்களில் பக்தர்கள் அனைவரும் மாஸ்க் அணிவது கட்டாயம்

* காலணியை பாதுகாப்பிடத்தில் பக்தர்களே விட்டு, எடுத்து கொள்ள வேண்டும்

* கால அபிஷேகம் அர்ச்சனை, கட்டண சேவைகள் மற்றும் விழாக்களில் கூட்டமாய் பங்கேற்பதை தவிர்க்க வேண்டும்.

* கோயில்களில் இருக்கும் பொருட்களை தொடக்கூடாது

* தனிமனித இடைவெளியுடன் தீபத்தை தொட்டு வணங்கி செல்லலாம்.

* அர்ச்சகர்களும், மாஸ்க் அணிந்து தனிமனித இடைவெளியை கடைபிடிக்க வேண்டும்

*எந்த பிரசாதத்தையும் அர்ச்சகர்கள், பக்தர்களுக்கு நேரடியாக தரக்கூடாது.

* தனித்தனியே பிரசாதங்கள் இருக்கும் தட்டுகளில் இருந்து பக்தர்களே எடுத்து கொள்லாம்

* உண்டியலை தொடாமல் காணிக்கை செலுத்த வேண்டும்.

* தடை செய்யப்பட்ட பகுதிகளில் இருந்து வருபவர்களை அனுமதிக்கக்கூடாது

* மாஸ்க், சமூக இடைவெளியை கடைபிடிக்காதவர்களுக்கு அனுமதியில்லை என்பதை அறிவிப்பு செய்ய வேண்டும்

* 65 வயதுக்கு மேற்பட்டவர்கள், 10 வயதுக்கு உட்பட்டோர் வழிபாட்டு தலங்களுக்கு வருவதை தவிர்க்க வேண்டும்.

* நுழைவுவாயில்களில் கிருமி நாசினி வழங்கும் வகையில் ஏற்பாடு செய்ய வேண்டும்.

*கொடி மரம் உள்ளிட்ட இடங்களில் அமர்வது, விழுந்து கும்பிடுவதற்கு தடை

* பிரதான சன்னதிக்குள் மட்டுமே அனுமதி வழங்கப்படும்.

*குறியிடப்பட்ட இடத்தில் வரிசையாக நிற்க வேண்டும்

* அர்ச்சகர்கள் பக்தர்களை தொட்டு, குங்குமம், பிரசாதம் பூ வழங்க அனுமதியில்லை. இவ்வாறு அந்த அறிக்கையில் கூறப்பட்டுள்ளது.

 

 

 

மாவட்டத்துக்குள் மட்டும் அரசு மற்றும் தனியார் பஸ்கள் ஓடும்

Private Bus and Govt Bus

தமிழகத்தில் தற்போது நடைமுறையில் இருக்கும் 7-வது கட்ட ஊரடங்கு இன்றுடன் நிறைவடைகிறது. இதையடுத்து தமிழகத்தில் நாளை முதல் மாவட்டத்துக்குள் மட்டும் அரசு மற்றும் தனியார் பஸ்கள் ஓடும் என்று முதல்-அமைச்சர் எடப்பாடி பழனிசாமி நேற்று அறிவித்தார். 

இதில் மாவட்டத்திற்குள்ளான பொது மற்றும் தனியார் பஸ் போக்குவரத்து, சென்னையில் பெருநகர பஸ் போக்குவரத்து சேவை நாளை முதல், நிலையான வழிகாட்டு நடைமுறைகளுடன் செயல்பட அனுமதிக்கப்படுகிறது என்று தெரிவிக்கப்பட்டது.

இந்த நிலையில் தமிழகத்தில் நாளை தனியார் பேருந்துகள் இயக்கப்படாது என்று தனியார் பேருந்து உரிமையாளர்கள் அறிவிப்பு வெளியிட்டுள்ளனர். அதில் மாவட்டத்திற்குள் மட்டுமே இயக்கினால் லாபம் கிடைக்காது என்றும் இருக்கைகள் அனைத்தையும் பயன்படுத்த அனுமதிக்க வேண்டும் என்று தனியார் பேருந்து உரிமையாளர்கள் கோரிக்கை விடுத்துள்ளனர்.